Mar 12 | LBB | STEP | E Iesu i asaer la ana ning a warwara larlar, mange, “Ning a barsan i oman tar a barim a wain, pa i tol alar tari. Tingui ana barim a wain ning, i kel tar a tung sur dir pas mirmiren tar a wana wain onoi, sur a polona ir hanot. Pa i tol a natar a rumai ning i tur usaot sur a tena tai alar. Lamur i saran tar kabah a barim a wain tana dingla na tarai a titol sur lar tai alari, pa i han ana ning a tinan.

aBuk Song 118:22-23

cKisim Bek3:6

dLo 6:4-5

eWok Pris 19:18

gBuk Song 110:1

Mark 12

A warwara larlar ana tarai a titol ana barim a wain

(Mt 21:33-46; Lk 20:9-19)

1 E Iesu i asaer la ana ning a warwara larlar, mange, “Ning a barsan i oman tar a barim a wain, pa i tol alar tari. Tingui ana barim a wain ning, i kel tar a tung sur dir pas mirmiren tar a wana wain onoi, sur a polona ir hanot. Pa i tol a natar a rumai ning i tur usaot sur a tena tai alar. Lamur i saran tar kabah a barim a wain tana dingla na tarai a titol sur lar tai alari, pa i han ana ning a tinan. 2 Ning a kalang ka sot sur dir git taum a wana wain, i sune sen ning a tena longor tetek a tarai a titol, sur ta wai ana nuna barim sur anunai otleng. 3 Ika a tarai a titol la tong akes pasi, la umi, pa la sune ulak oros seni. 4 Pa i sune sen ulak ning a tena longor tetek la, la um laulau tar a pukulna, pa la ame tari. 5 A taman na barim i sune sen ulak ning a tena longor, la um amat seni ka. Lamur i sune sen ulak a galis, la um dingla na tarai, pa dingla la um amat la. 6 Ning kama i kes teteki, a natnalik ot, i mang kol suri. I sune seni tetek la, pa i nuki mang lar hanrawai e natnalik. 7 Ika a tarai a titol la warwara taum pas mange, ‘I ma ning ir keles e tamana, imaine i han ute. Mulo lamut, dalar um amati, sur anundalai ma a barim a wain.’ 8 Pa la tong akes pasi, la um amati, pa la migen purum seni kusun a barim.

9 “Asa ning a taman na barim ir toli? Ir hanot pa ir um amat sen a tarai a titol, pa ir saran tar kabah a barim tetek dingla masik.

10 Mangmangasa, bel mulo was a warwara ne ana Buk Tabu? I atongi mange,

‘A hat ning a tena tol rumaila la kepseni,
i ot ning a ngangaten a hat ning di tol a rumai ono.
11 A utna ne a Leklek ot ka tol tari,
pa i wakak kol ana numila na tatatai.’” ^a
12 A ningnigola anuna tarai Juda la tai sur ta ngas sur lar tong akes pas e Iesu ono, anasa la tasmani mang i atong ka a warwara larlar ne on la. Ika la matatan a kunum a tarai. Pa la tur pas kusuni, pa la han.

A kabah ana totokom

(Mt 22:15-22; Lk 20:20-26)

13 La sune sen a Parisaiola, taum ana halalna e Herot tetek e Iesu sur lar alamlami sur anuna ta warwara lar tiwi ono. 14 Ning la hanot teteki, la atai i mange, “Tena Asaer, mila tasmani mang u a tostos a barsan. Bel u matmataut ana sa ning a tarai la atongi hom, anasa a ginim i arlar rop ka tetek a tarai rop, pa u asaer momol la ana ngas ane God ana momolna. Mangmangasa, i tostos sur dir saran a totokom tetek a Sisar ^{▼▼12.14Sisar i a tnan ningnigo ana matanitu Rom pa i nigon otleng a tarai Israel.} o bel? 15 Dalar sarani, o gong?” I tasman lalan anunla na asasongo, pa i deken la mange, “I mangasa ning mulo mang sur mulor toho iau? Ta mani ute ar oroi.”

16 Pa la saran tar ning a mani tana. Pa i deken la mange, “A manar pa a tumtumus ne ono anesi?” La kelesi mange, “Anuna Sisar.” 17 E Iesu i atai la, “Asa ning anuna Sisar mulor sarani tetek a Sisar, pa asa ning ane God mulor sarani otleng tetek e God.” Ning la longori, la kulkulan kol ono.

A kabah ana lalaun ulak kusun a minat

(Mt 22:23-33; Lk 20:27-40)

18 A Sadusila ning la sira puai ka mang bel ta lalaun ulak kusun a minat, la han tetek e Iesu, pa la dekeni mange, 19 “Tena Asaer, e Moses i tumus tari tan dala mange, ning ta barsan ir mat pas kusun anuna hane, pa bel ta natundiau, io, e tasnalik ir ben pasi pa ir taulai i, sur ir aitna tar al kakakla ana risana e tasnalik ning ka mat. 20 Ning a kabaitas, dionomahis a barsan rop ka. A ningnigona i taulai, pa i mat kusun anuna hane, pa bel ta natundiau. 21 Pa a areur a tasnalik kale i taulai a hane ning, i le i mat ka kusuni, pa bel ta natundiau. Mang otleng larning tetek a natolna. 22 La rop dionomahisla, la taulai i, ika a hane ning bel i agon tar ta kaklik on la. Pa a hane i mat murmur tan la rop. 23 Ana lalaun ulak kusun a minat, anesi momolma a hane ning? Anasa dionomahis la rop la ka taulai tari.”

24 E Iesu i keles la mange, “Mulo rongo kol, anasa bel mulo tasman a Buk Tabu pa a rakrakai e God otleng. 25 Ning a tarai lar laun ulak kusun a minat, bel lar taulai ulak, lar arlar kama ana angelola saot na langit. 26 Ning mulo puai mang a minatla bel lar laun ulak kusun a minat, mangmangasa belot mulo was a Buk ane Moses ning i warwara ana rakai ning i sot? E God i atongi tetek e Moses mange, ‘Iau a God ane Abraham, a God ane Aisak pa a God ane Jekop.’ ^c

27 Mulo rongo kol. E God bel a God anuna minatla, a God anuna lalauna ot.”

A warkurai ning i ngangaten kol

(Mt 22:34-40; Lk 10:25-28)

28 Ning a hala tena asaerla tagun a Warkurai i hanot, pa i longor e Iesu taum ana Sadusila la warwara. I longori mang e Iesu i keles wakak la, pa i dekeni mange, “Esi na warkurai i ngangaten tan la rop?” 29 E Iesu i kelesi mange, “Ine a ngangaten a warkurai momol, ‘A tarai Israella mulor longori, a Leklek anundala God i takai sot ka. 30 Mulor maris a Leklek anumulo a God ana balamulo rop, a ingumulo rop, a nuknukimulo rop, pa a rakrakaimulo rop.’ ^d

31 A naurna i mange, ‘Ur maris a halim larning u maris u ot.’ ^e

Bel ta warkurai i itna ana naur a warkurai ne.”

32 A tena asaer tagun a Warkurai i atai e Iesu mange, “I momol ot, Tena Asaer. I tostos anum a warwara, mang e God i takai sot ka, pa bel tik ulak ma. 33 Dalar maris e God ana balandala rop, a nuknukindala rop, pa ana rakrakaindala rop, pa dalar maris a halalindala larning dala maris dala ot. Ning dalar mur naur a warkurai ne, i ngangaten kol ana artabarla ning dala sarani tetek e God, pa a artabarla ning di tun seni.”

34 Ning e Iesu i oroi mang i warwara na tastasman, i atai i mange, “Bel u bakbak kusun a matanitu ane God.” Pa bel ma tik i han teteki ana ta kabah, anasa la matmataut.

A Karisito i a Leklek ane Dewit

(Mt 22:41-46; Lk 20:41-44)

35 E Iesu i asaer la ting na rumai a artabar, i atongi mange, “I mangasa ning a tena asaerla tagun a Warkurai la atongi mang a Karisito a nat e Dewit? 36 A Talngan Tabu i nigon e Dewit pa i atongi mange,

‘A Leklek i atai anuk a Leklek mange,
“Ur kes ting na sot a kuk,
tuk ning ar tolsot pas anum na hiruala
sur lar kes nahai anum a warkurai.” ’ ^{▼▼12.36“ E Leklek” i warwara o e God, pa “nuk a Leklek” i warwara o e Iesu.
,} ^g
37 E Dewit ot i atong a Karisito mang anuna Leklek. Ning i manglarning, io, di tamana mangmangasa?”

E Iesu i warwara na wetewete tetek a taraila ana ginina tena asaerla tagun a Warkurai

(Mt 23:1-36; Lk 20:45-47)

A tnan kunum a tarai la gas kol ning la longor a warwara ane Iesu.

38 Ning i asaer la, i atongi mange, “Mulor wetewete ana tena asaerla tagun a Warkurai. La mang sur lar taltal taum ana wakak a kaenla, pa la mang sur a tarai lar hanrawai la ting na pukna na han taum. 39 Pa la mang sur a keskesla salanigo na rumai lotula, pa a keskesla salanigo ana ngasa. 40 La sira amus a gongon anuna laola, pa la sira laes na tol a barbara a nunungla. Ir itna kol a warkurai ane God tetek la.”

A artabar anuna lao

(Lk 21:1-4)

41 E Iesu i kes milau tar a pukna na susua mani ting na rumai a artabar, pa i oroi a taraila ning la sua anunla mani onoi. Galis a tena gongon la sua a tnan mani ana pukna na susua mani. 42 Ika ning a kapan na lao, i sua tar ka naur a toia ana pukna na susua mani. 43 Pa e Iesu i kabah pas anuna kakak a asasaerla teteki, pa i atai la mange, “A atong momoli ta mulo, a kapan na lao ne, ka saran tar a tnan mani tan la rop ne. 44 La saran tukna tar ka ana gongon anunlai, ika a lao ne, i kapan, i saran arop sen asa ning ir toh pas anuna keskes.”